كيف تحدد أهدافك بالحياة؟

عشان توصل وتحقق فكرة او حاجة مهمة فى حياتك لازم تكون على شكل هدف محدد، وعشان تحقق الهدف ده لازم يكون له صفات أو عناصر معينة، الصفات دى كتبها باحث في علم الإدارة اسمه “جورج دوران” وعمل قاعدة أسمها  S.M.A.R.T

الكلمة دي اتكونت من اول حرف من خمس كلمات هم الخمس صفات، وانتجت كلمة SMART اللي كلنا عارفنها بمعنى ذكي، وفعلا طلعت القاعدة ذكية جدا لو طبقتها على أفكارك هاتقدر تحدد هدف ذكي وتحققه.

والخمس صفات هم:

Specific

ودى معناها ان الهدف بتاعك يبقى محدد وواضح، يعنى ماينفعش هدفك تبقى غني مثلا فى المطلق كدة، لازم تحدد انت عايز يبقى معاك كام علشان تحسب نفسك غني؟ وازاي هاتحصل عليها؟ ومين هيساعدك؟

Measurable

معناه ان هدفك يبقى قابل للقياس، يعنى عند وقت معين تقدر تقول انت حققت الرقم ده ولا لسه، وتتابع قياس نجاحك وفشلك في تحقيقه.

Achievable

يعنى هدفك يكون قابل للتحقيق أساسا، متحددش لنفسك هدف مستحيل أو صعب توصله فى المدة الزمنية اللى انت حددتها لنفسك عشان في الأخر هاتتصدم جدا.

Realistic

معناه ان هدفك يبقى واقعي وقريب من مجالك، ماتبقاش بتدرس هندسة وهدفك تكون إعلامي مشهور، يعنى ماتضيعش وقتك وتحقق كل العناصر اللى فاتت فى حاجة مش هتخدم مجالك أساسا.

Timely

يعنى هدفك يبقى مرتبط بوقت معين للبداية والنهاية، ماتسيبش كل حاجة مفتوحة قدامك عشان تقدر تقيم إنجازك وهل انت ماشى فى الطريق الصح ولا لأ؟

ده ببساطة شرح تطبيق قاعدة S.M.A.R.T واللى من خلالها هتقدر تحدد وتحقق أهدافك سواء فى حياتك الشخصية أو شغلك